Ezer Kenegdo

Jamita: Minggu, 16 Maret 2014, Passion III: Reminiscere

Leave a comment

Evangelium : Johannes  3:1-17

Holan Jolma Natubu Sian Ginjang do na Marnida Harajaon ni Debata

I.  Patujolo

Molo jinaha evangelium Johannes, manigor tarida do songon dia cara pamaritahonon  ni si Johannes manuturhon ngolu panghobasion dohot angka panghataion ni Jesus na so haru somal jumpang  di evangelium  Mateus, Markus dohot  Lukas.  Johannes mangalehon godang perhatian tu tolu sungkun-sungkun :  Parjolo:  Ise do Jesus i? Laho patoranghon hadirion ni Jesus naung ro tu portibi on dipangke istilah  “Hata i”,  “Daging”, “Hangoluan”, “Hatiuron”, “Hamuliaon”, “Anak sasada” dohot lan na asing.  “ Gabe daging ma Hata i jala maringan ditonga-tonga ni hita on,.. (1:14), asa marhite i gabe boi ma jolma  marnida Debata na sasintongna. Di evangelium on, digombarhon  Jesus do diriNa songon: Mesias na margoar Kristus (4:25-26), Ahu do roti hangoluan i (6:35), Angka na mauas, tu Ahu ma ibana ro minum (7:37-39), Parmahan na denggan (10:14), Hau anggur na tutu (15:1).  Paduahon: Aha do na niulahon/nihobasan ni Jesus laho patuduhon diri-Na songon Anak ni Debata? Johanes manurathon godang tanda halongangan na pinatupa ni Jesus, isarani Aek gabe anggur di huta Kana (2:1-12),  manamue 5000 halak ( 6:5-10), Pamalum na marsahit, pangoluhon na mate dohot angka na asing, patuduhon Jesus do Anak ni Debata na tongon mangulahon lomo ni roha ni Debata. Patoluhon: Songon dia hubungan antara na  mangihuthon Jesus dohot angka jolma na manghasogohon/mangalo Ibana? Evangelium on mangurupi hita laho mangantusi dohot denggan pergumulan ni angaka jolma naung mangulahon angka pangajarion na  baru na pinasahat ni Jesus dohot angka jolma na mandok na so boi ulahononnasida i alai tongtong do nasida satia tu angka uhum/patik ni si Musa.

Mangihuthon paretongan ni angka pande bisuk Padan na Imbaru hira taon 80/95M  ma evangelium on disurathon uju maringanan ibana di huta Efesus.  Jala hira sude do sapandapot angka pande bisuk Padan na Imbaru dohot  tokoh-tokoh Gereja  mandok  Si Johannes ima sahalak sisean haholongan ni Tuhan Jesus na gabe Apostel manghatindangkon  dohot mamaritahon Barita Nauli i (panurat Evangelium Johannes on).  Laos ibana do muse  panurat buku 1,2,3 Johannes dohot buku Pangungkapon di Padan Na Imbaru. Disangkapi roha ni panurat evangelium Johannes on do naeng mamangkulingi sandok  halak na pistar, na bisuk, angka pangajari, ro di angka na sangap ni portibi on, asa tung ditanda jala dihaporseai Jesus Kristus do Anak ni Debata, na mangalehon hangoluan di angka na porsea di HataNa (20:31). Laos i do na pinasahat ni Tuhan Jesus tu si Nikodemus dibagasan turpuk jamita on.

II. Hatorangan ni Turpuk

Guru na ringkot marguru tu Jesus Kristus (ayat 1-2): Guru i ma angka na pinatujolo gabe pangajari di tongatonga ni sada bangso. I ma angka na pistar, naung godang mangguruhon parbinotoan, jala na  gabe sitiruon ni torop halak di ngolu siganup ari. Adong do sintongna molo adong mandok, ingkon jagaon ni guru wibawana songon halak na pistar, manang pakar na gabe panungkunan ni natorop.  Asa adong ma sahalak sian Parise, sintua ni Jahudi na margoar Nikodemus. ( KJV: There was a man of the Pharisees, named Nicodemus, a ruler of the Jews)  Nikodemus i ma sahalak sian Parise jala sintua ni Jahudi (pemimpin agama Yahudi-anggota Sanhedrin) na patuduhon parange na denggan tu Jesus marhite na ro borngin borngin manopot Jesus laho marsiajar. Tarjalo roha do pambahenan ni si Nikodemus molo ingkon borngin borngin ibana manjumpangi Jesus, apalagi laho manungkun-marsiajar tu sahalak Guru na imbaru jala parhutahuta,  alana hurang suman molo sahalak sintua ni Jahudi  na margoar Nikodemus molo songon angka natorop i ibana paihutihut Jesus, apalagi molo diboto angka donganna halak Parise. Di turpuk on, tarida do parsitutuon ni si Nikodemus laho mangantusi pangajarion ni Jesus, dihauasonna diparbinotoan i dihilala ibana do  “Yesus memiliki sesuatu yang tidak ia miliki”.  Tarida do haserepon ni roha ni si Nikodemus, na tongtong olo marsiajar hape sahalak guru na sangap do ibana di mata ni angka na torop, alai dijolo ni Tuhan Jesus tung mansai godang dope siguruhononna.  Gariada hira na hurang talup dope si Nikodemus gabe guru, ai so tarantusan ibana dope ruhutruhut laho marnida Harajaon ni Debata. Tarida do i dung disungkun si Nikodemus gabe dialusi Jesus marhite sungkunsungkun muse, “Ho, guru ni bangso Israel, ndang diboto ho i?” (ay.10).

Tung andul do asing pangalaho ni si Nikodemus songon sahalak Parise martimbangkon donganna Parise na asing, tongtong do dihauashon ibana parbinotoan jala laho do ibana mangguruhon i tu Jesus bornginborngin asa tung sagat nasida manghatai, jala boi dapot hatorangan na bagas taringot tu na sinungkunhonna tu Jesus. I do umbahen dung pajumpang ibana dohot Jesus, pintor sportif do ibana memulai panghataion, “Gurunami… (tontu mansai maol do on di ibana, ai sahalak guru do tong si Nikodemus jala nunga tumua/lebih senior ibana sian Jesus), alai olo do si Nikodemus mangakui halobian ni donganna, diparsangapi ibana donganna, ndang gabe hahurangan ni Jesus dilului ibana songon na pinatupa ni halak Parise na asing na sai jotjot mangalului hasalaan ni Jesus dalanna laho manjehehon Jesus. Parjumpangan ni si Nikodemus dohot Jesus tontu mamboan hasil, martua do si Nikodemus ala dapotsa hatorangan na tangkas taringot tu ngolu na imbaru i sian Tuhan Jesus. Borngin na uli do borngin i di si Nikodemus, ai gabe diantusi ibana hinaringkot ni ngolu na imbaru i.

Lapatan ni na tubu sian ginjang (ayat 3-8): Langsung do diarahkan Jesus panghataion nasida tu pokok persoalan na adong dibagasan roha ni si Nikodemus, i ma taringot  “ Harajaon ni Debata”. Dialusi Jesus, “Na tutu situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata”. Alai maol do diantusi si Nikodemus hatorangan ni Jesus. Diuji si Nikodemus do muse mangantusi pangajarion ni Jesus marhitehite hapistaranna, alai ambal do sian na  nimaksud ni Jesus. Pandohan ni Tuhan Jesus di ayat 3, dilapati si Nikodemus marhite  pikiran (akal budi) pardagingon, “Songon dia ma tarbahen tubu muse halak, ia naung matua? Tung haulahansa ma mamasuhi siubean ni inana, asa tubu?. Hape na nidok ni Tuhan Jesus i, boi antusan holan marhite pikiran (akal budi) partondion do (patudos Rom.12:2). Ai ngolu na imbaru, na nidok ni Tuhan Jesus:”tubu sian ginjang”, ima ngolu na mangadop tu tondi , ndadaa mangadop tu hagiot ni daging”. Alani na tubu sian ginjang lapatanna marngolu na imbaru, ima ngolu na dibagasan panogunoguon ni Tondi Parbadia. Nasa na marngolu na imbaru, i ma na tubu sian aek dohot Tondi. Alai dia do lapatan ni na tubu sian aek dohot Tondi? Na marpardomuan do pandohan i tu na marnida dohot mamongoti Harajaon ni Debata. Na sahat marnida jala bongot sogot tu bagasan Harajaon ni Debata i ma angka halak na ias roha, “Martua ma parroha na ias, ai idaonasida do Debata” (Mat.5:8). Alai ndang adong nanggo sahalak pe jolma na ias roha, ia so jolo dipaias sian saluhut hajahatonna di na robi. I do umbahen ingkon “tubu sian aek”. Alai ndang sae holan i, ingkon dohot do tubu sian Tondi. Lapatanna ndang sae holan ias sian dosa ditingki na salpu. Memang, nunga salpu jolma na parjolo i, jala nunga soluk jolma na imbaru marhite pandidion na badia i, alai ringkot do jaloon hagogoon ni Tondi Parbadia, asa margogo na porsea i jala monang maralohon nasa na jat saleleng di portibi on. I do na nidok ni Tuhan Jesus, “tubu sian Tondi”.  Pangajarion na pinasahat ni Tuhan Jesus naeng patorangkan tu si Nikodemus na salelengon memahami bahwa nasida sebagai halak Jahudi merupakan pomparan ni si Abraham tontu nunga otomatis gabe anak ni Debata,  alai Tuhan Jesus patoranghon  ingkon na tubu  sian Tondi do, ndang cukup holan tubu sian keluarga ni Jahudi manang molo nunga mangulahon patik.

Haluaon marhite panobusion ni Tuhan Jesus (ayat 9-17): Hatorangan na nilehon ni Jesus tong dope maol siat dipingkiran ni si Nikodemus, “Songon dia ma tarpajadi i?  Laho mangalusi sungkunsungkun ni si Nikodemus gabe diarahon Jesus do pingkiran ni si Nikodemus tu pamingkirion secara partondion ndang secara pardagingon, “Ndang adong na manaek tu banua ginjang,… (ay. 13). Ibana do na di banua ginjang hian, alai naung tuat sian i asa dihatahon Ibana tu hajolmaon angka na di banua ginjang. HatutuatNa sian banua ginjang marsangkap do laho manait angka na porsea tu banua ginjang.  Patimboon…(ay.14) dipangke Jesus tu dua hal i ma : parjolo, patimboon ma Jesus tu hau pinorsilang di Golgata (jaha Joh.8:28 ; 12:32), paduahon, patimboon ma Jesus tu hamuliaon uju tarhinsat Ibana tu banua ginjang (jaha Ul.2:33; 5:31; Fil.2:9). Proses “patimboon ma Jesus” digombarhon diturpuk on songon ulok na pinatimbo ni si Musa uju mardalan bangso Israel di halongonan sian tano parhatobanon Misir tu tano Kanaan. Ulok na sinunggulanna ima sada ulok sian tulung api na tarbuat sian tombaga na disuman si Musa huhut disangkothon tu hau partonggol, jadi manang ise na pinargut ni ulok di halongonan i jala dibereng dompak ulok tombaga i, malum ma ibana. Sada tipologi do na binahen si Musa i tu na patimbohon Anak ni Jolma i di turpuk on, martudutudu tu na pinarsilanghonna i Jesus, angka pardosa na mamereng silang huhut solhot tu silang ni Tuhan i do na dapotan hasesaan ni dosa dohot haluaon. Sangkap patimbohon Anak ni Jolma i ima asa dapotan hangoluan na salelenglelengna ganup na porsea di Ibana. On ma hata ni Jesus na tu si Nikodemus na sangat terkenal, i ma ayat 16, “Ai songon on do holong ni roha ni Debata di portibi on,… Sian dialog antara Nikodemus dohot Jesus, dapot ni si Nikodemus  ma sada pangajarion taringot haluaon i ma marhite panobusion, pola ditaon Jesus haberniton, insakinsak, durus mudarNa jala mate di hau pinarsilang, ditanom jala mulak mangolu di ari patoluhon. Asa ndada alani pomparan ni si Abaraham secara pardagingon  manang alani pangulaon ni patik. Haradeon ni Debata marsuru AnakNa mamorsan dosa ni jolma i asa unang mago jala unang mangolu dibagasan uhum. Alai haluaon sian uhuman i do dipatupa marhite panghophoponNa. Asing sian panghophopon ni Kristus i ndang adong pamintorion. Ndang tuk pangulaon ni patik mambahen jolma pintor manang rumang ni pelean aha pe dang tuk paluahon jolma. I ma panindangion na mansai arga. Tuhan Jesus na ro sian ginjang, ido mangatasi saluhutna, asa ndang uhumonna portibi on alai asa paluaonna. Dung ditobus jolma i ndang adong be huaso na mangihoti ibana, gabe anak ni Debata ma jolma i na manjalo tohap dohot tumpal sian Harajaon ni Debata.

III. Sipahusorhusoron

–          Persoalan na mendasar jotjot jumpang di ngolu ni halak Kristen  i ma pangantusion na so haru hantus taringot tu lapatan ni pandidion na badia. Godangan dope halak Kristen na marnida sakramen pandidion holan sekedar mangalap goar, manang asa tartingting di huria. Hape mansai bagas do na hinangham ni pandidion  na badia i, ai di na tardidi hita, disi do hita tubu paduahalihon, ala nunga dipaias hita sian nasa dosa jala mamungka sian i ma hita mandalani ngolu partondion.  Aek, ima simbol ni pamurion (cleansing), Tondi, ima simbol ni hagogoon asa mampu jolma  patupahon angka na denggan. Alani, naeng ma tangkas antusan ni halak Kristen, ia na rumingkot di angka halak naung tardidi (dakdanak manang na magodang) i ma manghilalahon huaso ni Tondi Parbadia na margogoihonsa mangulahon nasa na denggan jala mangalo na jat.

–          Jesus Kristus do haluaon dohot hangoluan di hita. Nunga ro Ibana tu portibi on paluahon hita pardosa asa dapotan hangoluan salelenglelengna hita  (Joh.3:16).  Hangoluan na salelenglelengna (eternal life) do jambar ni na porsea di Jesus. Jala holan Debata sambing do na tuk mangalehon tu hita eternal life on. Patumonaan ni ngolu na salelenglelengna nunga bongotonta nang pe mian di portibi on dope hita jala hasisingkopna jaloonta ma i di ngolu na manongtong di surgo hasonangan i sogot. Ido umbahen sai martangiang hita ditangiang hatopan na diajarhon Tuhan Jesus, ima : Sai ro ma harajaonMu. Antong marhite turpuk on diajari do hita asa manghangoluhon kualitas na tumimbo sian kualitas ni ngolu portibion marhite na tongtong marparsaoran dohot Debata.

–          Di Minggu Reminiscere (Sai ingot ma ale Jahowa angka denggan ni basaM),naeng ma tomutomuonta Jesus Kristus dipardalananNa menuju Jerusalem, jala disi ma saut sangkap haluaon i laho manobus hita jolma pardosa marhite na rade Ibana nangkok tu hau pinorsilang. Antong ganup jolma naung pinalua ni Kristus unang be  sarombang dohot portibi on, alai gabe imbaru ma hita (Rom.12:2).  Imbaru na pinatupa ni Debata (Kainos), i ma molo dibereng tong do i jolmana na boi marsahit,  na boi gale, na sipata marsitaonon, alai adong na imbaru, adong  Tondi Parbadia na paimbaruhon gabe mangolu jolma i berdasarhon nilai-nilai Debata, jala  tarida do i sian parbuena ima parbue ni Tondi (patudos  Galatia 5:22).  Antong lam taguruhon ma marngolu na imbaru, asa lam margogo hita manaluhon nasa na jat marhite angka ulaon na denggan i ma  patupahon angka parbue ni Tondi i, ai ndang maralo patik dompak angka sisongoni. Amen

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s