Ezer Kenegdo

Angka na Porsea tu Tuhan Jesus gabe Panean di Bagabaga ni Debata (Roma 4:1-5+13-15

Leave a comment

I.Patujolo

Di dok angka penafsir, ia surat Rom manggombarhon pangarimpunan ni pamaritahonon dohot teologi ni Apostel i, jadi digoari do surat Roma on songon testament ni si Paulus. Di surat ni Apostel Paulus tu halak Rom, disurathon ma sada hatorangan na tangkas taringot tu barita nauli ni Kristus Jesus.  Surat Rom on ndada holan sekedar songon surat, alai na terutama ima sebagai uraian teologis na disusun denggan. Alani disagi angka pande bisuk do surat Rom on tu dua bagian, ima: parjolo, hatorangan na bersifat dogmatis, na patoranghon taringot tu ruhut-ruhut haporseaon ni halak Kristen (bindu 1-11) dohot  paduahon,  hatorangan  na bersifat parksis, na manaringoti ruhut-ruhut mamarangehon haporseaon i (bindu 12-16). Na mate do haporseaon  i molo so tarida parbue ni haporseaon. Secara khusus turpuk Epistel on masuk do tu na parjolo (hatorangan na bersifat dogmatis).

Disurat Apostel Paulus surat Rom on sekitar taon 55-56 M huhut  patandahon dirina tu angka halak na mangihuthon Kristus  (1:1),  jala ia ruas ni huria Rom dua bagian, ima halak Kristen sian halak Jahudi dohot halak Kristen diduru  ni halak Jahudi.  Apostel Paulus mangajarhon di surat Rom on bahwa barita na uli didasorhon sian padan ni Debata tu si Abraham, ompu ni bangso Israel na mandok:”ibana tumean portibion marhite sian hatigoran na sian haporseaonna i do (4:13). Patik na nilehon ni Debata tu si Musa dohot bangso Israel, patuduhon dohot mangajarhon songon dia bangso ni Debata i mangolu. Jala ujungna muse, disuru Debata do Anakna Jesus Kristus ro tu  portibi on laho manobus dosa ni jolma  jala dipintori  Debata do jolma i alani haporseaonna tu Jesus Kristus,  jadi ndang alani na mangulahon patik umbahen malua,  alana tung  so adong do jolma boi mangulahon patik i mansai denggan.  Pamintorion i, ndada holan tu halak Israel (Jahudi) sajo,  alai dohot do tu bangso na asing (Rom. 11:11+13).

II. Hatorangan ni Turpuk

Ayat 1-5 Dipintori alani haporseaon.  Molo adong naeng ditodo gabe tiruan tu habonaron pasti do i si Abraham  na gabe “aleale ni Debata” (Jakobus 2:23). Abraham  na dipintori  Debata, alai dipintori pe ibana ndang alani pangulaonna, alai na porsea do ibana, gabe i ma dirajumi bahen hatigoranna.  Songoni muse nang  Raja David sahalak naposo ni Debata, alai tong do godang hajahaton naung niulana: Daud pabunuhon si Uria , sinonduk ni si Batseba dungi mangalangkup ibana tu si Batseba (2 Samuel 11-12).  Gabe pintor  do Raja David  ndang alani parulaonna.  Haporseaon ni si Abraham na tung mansai andul (mencolok) ima marhite hasetiaon dohot haundukonna mangulahon na sinuru ni Debata ima asa bungkas sian tano hagodangonna Ur-Kasdim  laho tu tano Kanaan (1 Musa 11-12, 15:17), tarlumobi haundukonna laho mamelehon anak haholongan ni rohana ima si Ishak  (1 Musa 22).   Haporseaon ni si Abraham on ma na ingkon gabe tiruan ni angka na porsea. Parsigantungan dohot parsihohoton ni si Abraham tu Debata,  songoni nang parsigantunganta (haporseaonta) tu Kristus naung manobus hita jolma  pardosa on.  Alani,  Kristus do na gabe dasar pamintorion tu angka halak na porsea.

Ayat 13-17:  Sude angka na porsea i gabe panean dibagabaga ni Debata na tu si Abraham.  Godang do halak Kristen Jahudi mandok, halak Kristen na sintong, ima halak na mangulahon sude patik na nilehon ni Debata tu bangso Israel marhite si Musa. Ido umbahen dipatorang Apostel Paulus fungsi dohot peranan ni patik na nilehon ni Debata tu bangsona, jala ndang marnaloja ibana patorangkon lapatan ni patik i tu nasida. Dipatorang Apostel Paulus do muse tu angka siboto surat,  dipintori Debata si Abraham dao andorang so dilehon si Musa patik i. Jadi, dihaporseai si Abraham do  Debata andorang so ro dope patik ni Debata na sampulu i. “Ibana tumean portibian, marhite sian hatigoran na sian haporseaon i do” (ay.13). Hape dibagasan sejarah halak Jahudi dibagasan ginjang ni roha (kecongkakan-kesombongan) jotjot mandok, nasida pinompar ni si Abraham, ompu ni bangso nasida, jala patik na nilehon ni  Debata mambahen nasida  merasa lebih eksklusif (istimewa) martimbangkon bangso na asing. Alani i do ndang marnaloja Apostel Paulus patorangkon fungsi dohot peranan ni patik na ni lehon ni Debata, “ai aut angka siradoti patik i  gabe panean, ndang marguna haporseaon i, jadi pesan ma bagabaga i” (ay.14). Songoni muse si Johannes Pandidi hea mandok tu halak Jahudi, “Jala so tung didok hamu dibagasan rohamuna, si Abraham do amanami! Ai hudok ma tu hamu, tarjadihon Debata do anak di si Abraham sian angka batu on! (Mat.3:9). Songoni do nang Jesus hea mangalusi sungkun-sungkun ni halak Jahudi, “Molo angka anak ni si Abraham do hamu ( dibagasan partondion ndang pardagingon), ulaonmuna do songon na binahen ni si Abraham, alai dilului hamu do dalan asa naeng mamunu ahu… ndang i naniula ni si Abraham (Jaha: Johannes 8: 31-40).

Dasar hasetiaon dohot haundukon ni si  Abraham ndang manatap tu angka naung niulana,  alai Abaraham manatap dompak padan ni Debata  ima  Debata marbagabagahon tu si Abraham mangalehon tano Kanaan dohot pinompar na mansai torop songon torop ni bintang di langit dohot pasir di topi laut,  jala dihaporseai ibana Debata. Alani i do gabe teladan ibana jala digoari “ama ni hita saluhutna do” (ama ni angka na porsea) marhitehite ibana gabe dipasupsu do sude angka bangso. Bagabaga pasupasu tu si Abaraham, ndada holan tu halak Jahudi pinompar ni si Abraham di pardagingon, alai sude halak na porsea do halak Jahudi nang na so Jahudi, jala anggo Kristus  nampuna hita , pinompar ni si Abraham do tong hita jala panean mangihuthon bagabaga i (bnd Galatia 3:14; 29).

III. Sipahusorhusoron

  1. Haporseaon na pinatuduhon ni si Abraham marhite haundukonna tu parsuruon ni Debata gabe tiruan tu angka halak na porsea. Pangoloion dohot haundukon ndada di hata hataridaanna alai dipambahenan. Jotjot do masa di ngolu ni jolma, mura mangundukhon hape maol mangulahon manang ndang diulahon. Sipata gok angka suhatsuhat/pertimbangan ni jolma laho mangulahon ulaon, jumotjot ma i masa alani na mangolu dibagasan ginjang ni roha,  gabe tubu dibagasan rohana, “tung ahu ma ? ndada ahu dope na patut mangulahon na songoni, ala dirajumi dirina sumangap sian halak na asing. Jadi tanda halak na porsea tu Debata ima marhite na mangulahon parsuruonNa.
  2.  Haporseaon tu Kristus do mambahen hita gabe panean di bagabaga ni Debata, ndang angka na mangulahon patik songon pemahaman ni angka halak Kristen Jahudi na mandok, “angka na mangulahon patik, nasida ma angka na tutu situtu dapotan haluaon manang kemerdekaan”. Ido alana marlumbalumba nasida laho mangulahon patik alai gabe lupa do nasida di haporseaon dohot holong ni roha. Bagabaga ni Debata dilehon do ndada holan tu angka pinompar ni si Abraham alai dohot tu sude angka na porsea tu Jesus Kristus. Dibagasan Jesus Kristus do patar holong ni roha ni  Debata namangalehon haluaon di portibi on, ndang adong goar na asing sian goar ni Jesus Kristus.  Amen

 

IV.  Bahan Diskusi :

  1. Sude do hita manjalo parsuruon ni Debata, boha do sikap manang responta tu parsuruon i, tarlumobi parsuruonNa tu hita laho mangula di bagas joro ni Debata.  Molo Abraham tarida do i dihaundukonna mangulahon saluhutna parsuruon ni Debata, i do umbahen gabe dipintori Debata ibana.
  2. Haporseaon tu Kristus mambahen hita gabe panean di bagabaga ni Debata, ndang alani na mangulahon patik. Boha do hita memahami kalimat on.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s